橫台山 2015 April 19

http://www.imagebam.com/gallery/osfaiww3zyx3g13chrv686tm3ygcexi3

http://nextplus.nextmedia.com/news/spot/20150425/188467


元朗在剛過去的週日有江湖盛宴，黑白兩道都雲集，記者收到消息去採訪，都係好平常心面對。事關記者一向跑開「硬新聞」，雖然遇過窮兇極惡兼喊打喊殺嘅人，但所接觸嘅大部分江湖大哥，尤其係老一輩，對記者反而唔會兇狠，佢哋曾經講過，江湖人物都係武人，記者係文人，所以點都會有少少尊重，只要唔好屈佢哋就得。


由於本刊經常揭露黑社會消息，所以向來受到江湖人物注意，幾乎期期都會追睇，有時甚至嫌唔夠喉，會主動打來爆料，《壹》仔喺佢哋心中都有多少江湖地位。

今次係元朗江湖名人四眼民設宴，記者當晚見到唔同江湖人物，梗係去撩佢地做訪問，原本以為會被人兇番轉頭，點知個個江湖人物都好客氣，有啲仲肯詳談，最衰現場舞龍舞獅太嘈，大家唯有愈講愈埋好似咬耳仔咁，唔知仲以為大家好親密，最後對方更答應日後可以做詳細訪問，大爆傳奇事跡。

其他江湖人就笑住避開，仲有人好奇反問：「你係女仔咁嫩，點解都來做江湖新聞呀？」搞到已為人母的記者哭笑不得。

其後見到高大威猛嘅高佬和，記者又走去截停人，點知高佬和一聽是《壹週刊》記者，打個突之餘，仲向身邊人爆一句。「嘩！《壹週刊》好恐怖㗎……。」元朗14K揸fit人四眼細就更加扭擰，拒訪之餘，仲好誇張咁不停揮動雙手，大叫唔好影佢，似乎要向其他江湖人顯示自己同《壹週刊》冇交情。

另一江湖猛人爵士陳志強亦有到場，佢同行兄弟就相當護主，除索取記者卡片外，更用手機拍下記者和攝影師樣貌，但全程都好客氣。而主角四眼民則一直沉默是金，對記者提問，全程以「今日唔好講呢啲嘢啦」來推搪。

若要數頭腦轉數高，非新界王發叔莫屬，記者問發叔同四眼民及高佬和關係時，佢老人家好精靈咁雙眼一碌，跟住施展一招太極推手講：「嗯，來得呢度個個都係親戚，個個都好好感情……。」